MUSANG DAN KOPI
Kisah si musang. menurut sahibul hikayat, bahwa satwa musang itu bintang malam, bagarit malam, mancari rajaki di waktu malam. siang inya guring saharian, tapi malam inya mancarri makan. pada suatu hari musang ini kapingin ma-ubah cara panghidupannya, yaitu, malam inya guring siang inya bagarit mangsa, nang kaya bubuhan warik, tupai, bakantan, burung wan lain-lainnya
sang musang ini mendapat fatwa matan palanduk, supaya musang banyak-banyak mamakan buah kupi masak, sahingga inya kada lagi mangantuk siang. malahan ujar palanduk, makin banyak mamakan buah kupi masak, inya bakaln taguring samalam suntuk.tapi isuk siangnya inya musti tabangun nang kaya bubuhan tupai. sahingga inya kawa jua bacari rajaki di siang hari.
"ikam lihat haja bubuhan kami, kijang, manjangan, tupai, bakantan, kambing, macam-macam, samua-an siang bacari makan, malam istirahat guring", ujar palanduk banasihat lawan musang.
"umai kawanku palanduk", ujar musang sambil bagaru kapala.
"sudah sagarubak aku mamakan buah kupi masak-masak. tapi aku tatap mangantuk, tatap taguring siang saharian suntuk. ikam mambunguli aku kah palanduk?".
"bah.., ini kadasuah mambunguli, barangkali ikam saurang nang bungul. ujarku samalam, kupi masak itu ditutuk dahulu, diayak, dicampuri banyu panas jangan bagula. campuri bigi pinang, lalu diminum. pasti musti, hakkul yakin, ikam ampih mangantuk. musti mata ikam itu kada guring lagi, habang manciling kaya mata burung pialang".
"astagaaaaa.... aku tasalah, wallai", ujar musang.
"buah kupi itu kutaguk bulat-bulat, nang kaya aku managuk buah hanau, imbah itu aku kakanyangan, lalu aku tabahira. kuhira-akan baciciran dipinggir timbuk. bulat-bulat nang kaya buah kupi asli".
"Oooo..... mamadai haja, julak nang bawarung disimpangan itu saban ba-isukan, asik mamilihi tahi ikam. lalu di ulah sidin kupi tutukan. dingarani sindin "kupi luak", ujar palandung ma-ulu-ulu.
"kupi luak tu napa wal?" musang batakun handak tahu.
"luak itu artinya musang. ikam tu pang" sahut palanduk
"umaiii... makalaham, aku apakalah banar. tapi tahiku jadi kupi", ujar musang bagamat, himung bacampur supan.
imbah satumat tungak tingadah, si musang manganga-akan muntungnya luas-luas. "Uaaaahhhh.... hemmmm..... nah aku mangantuk pulang" ujarnya sambil batitikan liur
"ayu..... kasana..... guring ja batuhuk", ujar palanduk sambil maninggal-akan kawannya ngitu
SEKIAN...
